Ұлттық музейде «Ер есімі – ел есінде» мен «Жеңіс: ұрпақтар арқылы жол» атты жалпыреспубликалық акциялар аясында «Батырлар – ұрпақ есінде» көрмесі ашылды.

Көрме Кеңес Одағының Батырлары Бауыржан Момышұлына 115 жыл, Мәлік Ғабдуллинге 110 жыл, Әлия Молдағұловаға 100 жыл толуына орай ұйымдастырылды.

Іс-шараның мақсаты – музей заттарының негізінде Қазақстанның Ұлы Жеңіске қосқан үлесін дәріптеу, сондай-ақ өскелең ұрпақты батырларымыздың батылдығы мен ерліктерінің мысалында отансүйгіштікке тәрбиелеу.

Көрме Қазақстан Республикасының Ұлттық музейі, Жамбыл тарихи-өлкетану музейі, Әлия Молдағұлованың мемориалдық музейі мен Мәлік Ғабдуллин музейі қорынан ұйымдастырылған.

Экспозицияда Кеңес Одағы Батырыларының әскери киімдері, жеке заттары, соның ішінде Мәлік Ғабдуллиннің «Алтын Жұлдыз» медалі, Әлия Молдағұлованың Жоғарғы Кеңес Президиумының грамотасы, Бауыржан Момышұлының соғыс кезінде қолданған Әскери стратегиялық картасы, т.б. музейлік құндылықтар көрсетіледі. Сонымен қатар, көрмеде Астана қаласының «Атамның Аманаты» қоғамдық бірлестігінің материалдары ұсынылған.