18 мамыр күні Кеңес Одағының Батыры Ә.Молдағұлованың облыстық мемориалды музейінде Халықаралық музейлер күніне орай, «Отбасымен музейге барайық» - «Музейдегі түн - 2023» мәдени-ағарту шарасы өтті.
Музей түні кешкі 19.00-ден 24.00-ге дейін жалғасты. Музей түні қорымызда сақталған Әлия Молдағұловамен бірге мергендер мектебінде оқыған мерген қыздардың оқу-жаттығу кезіндегі түскен фотоларының көрмесімен басталды.
Жергілікті «Жауынгерлік бауырластық» қоғамдық қорының іздестіруші мүшелерінің ұрыс даласынан, экспедиция барысында әкелінген қару-жарақ түрлерінен, музейге жеке жинағынан Нұрбек Айбатулин тапсырған «Соғылған болат темірден» - әскери үлгідегі танкілердің мини-макеттерінен , музей қорында жинақталған 20-дан астам жауынгерлік каскалардан, жауынгерлердің ас мәзірінен көрмелер жасақталды.
«Елге Жеңіс әкелген...» цикл аясында М.Оспанов атындағы Батыс -Қазақстан Медициналық Университетінің тәжірибелік дағдылар орталығының оқытушылары Қаршыға Сембаева мен Дарья Досқабыловалар төтенше жағдайлар кезінде Алғашқы дәрігерлік көмек көрсетуден шеберлік сағаттарын өткізді. Әл-Фараби атындағы №21 мамандырылған гимназия мектебінің 11 класс оқушысы Тоғжан Сарина мен Ақтөбе индустриалды – кәсіптік колледж студенттері автоматты шашып-жинауды келушілерге үйретіп, уақытқа жинап жарысты. Ал, «Әлия» іздестіру тобының мүшелері плащ-палатка құрып, соғыс далаларындағы қару-жарақтарды жаңа технологияларды пайдалану (металлоискатель) арқылы іздеу әдістерімен бірге, оқ-дәрілердің немістердікінен айрымашылықтарын көрсетті.
«Музей жаршысы» - Ұлы Отан соғысы жылдарындағы плакаттар, хабарламалар, афишалардан жасалған жарнамалық тумба қойылып, «Әскери дала поштасы» - майдан даласынан келген хаттар мен музей қорындағы патефондарға арналған ескі пластинкалардан инсталляция көрсетілді.
«Білгенге маржан...» викториналық ойындарға кішкентай келушілеріміз қатысып, соғыс тақырыбына қатысты сұрақтарға жауап беріп, шағын сый-сяпаттарға ие болды. Ұлы Жеңіс әндерінен патриоттық әндер караокесі ұйымдастырылып, музей ішіндегі жертөледе(блиндаж) сырнаймен Жеңіс әуендері шырқалып, халық бір серпіліп қалды.