2024 жылғы 22 маусымда Ақтөбе қаласындағы «Мәңгілік алау» мемориалдық кешенінде Ұлы Отан соғысының басталғанына 83 жыл толуына орай еске алу шарасы өтті. Іс-шараның мақсаты – соғыс жылдарында қаза тапқан жауынгерлердің рухына тағзым етіп, олардың ерлігін кейінгі ұрпаққа жеткізу.
Шараға қала тұрғындары, мемлекеттік органдардың өкілдері, әскери қызметшілер, жастар және қоғамдық ұйымдардың мүшелері қатысты. Жиналғандар «Мәңгілік алауға» гүл шоқтарын қойып, соғыста қаза болған жауынгерлерді бір минут үнсіздікпен еске алды. Сонымен қатар соғыс жылдарындағы тарихи оқиғалар мен ақтөбелік жауынгерлердің ерлігі туралы айтылды.
Ақтөбе облысынан соғыс жылдарында 122 мыңнан астам адам майданға аттанған, олардың 36 мыңнан астамы елге оралмаған. Өңірдің 35 тумасына Кеңес Одағының Батыры атағы беріліп, 9 жауынгер «Даңқ» орденінің толық иегері атанған.